香港政府要我擁護我的黑社會老豆

養娘從來冇迫我地認，當然亦唔係佢養我地。只不過係要我地跟住佢搵食，教左我地一套搵食的手藝。方法又幾使得，令到我地可以自食其力。有的兄弟仲由於係咁發達左添。

我地以前仲時不時賑濟番窮阿爺。好似六十年代所謂大飢荒幾年，即係好多人偷渡落黎嗰陣，錢啦、油啦、糖啦、布啦，食得嘅，著得嘅都唔知擔左幾多返鄉下。

而家阿爺發左，要攞我地番去。無法啦，鬼叫唔係自己生，養娘又家道中落，拐帶細路，始終唔好。聯合國都禁止左，要還番俾人地。養娘只好在風雨交加之夜，交番我地俾阿爺。

始終阿爺係反賊出身，發財未立品，死性不改。對唔同意佢嘅做法家人，終日以家法待候，淨係識得關埋門打仔打餐懵，打死罷就，再唔係鎖埋你一邊。隔離人地勸下，都話人地多Ｘ事。粗口爛舌，拎起拳頭差的要打埋人地咁滯。

有咁嘅阿爺，我地條命苦。

如果大家想有幸福嘅將來，就算係老豆阿爺都無情講，一於大義滅親。

養娘雖然唔算係好好，但點都叫做教識我地好多現代文明同埋禮貌。我地唔會隨地吐痰吐口水，唔會係人多地方大聲購野。等車識得排隊，又唔會係街隨地踎。有唔同意見大家可以講清講楚。唔會嚇嚇講打講殺。

仲有我地守法，唔需要嚇嚇使黑錢。政府做得唔啱，仲可以炳佢，打官司告佢都得，唔使驚俾人報寸，又唔擔心請唔到律師（政府唔敢嚇的律師話唔俾牌佢）。

仲有唔會有衰人整的毒奶，毒魚，毒乜毒物黎害人。

好多好多講唔哂。咁係咪要多謝養娘吖？唔通阿爺會識得教我地呢的野咩，佢自己都成個爛仔衰衰咁。

不過自從回歸左，好多野都變左。隨街見人吐痰，隨地踎，講野大大聲啦.....